政情：陳家強爆Seed 鬧特朗普發動冷戰
中美貿易戰持續，雖然目前對香港嘅影響唔算好大，但係業界就非常擔心，因為美國總統特朗普好難預測，都唔知嚟緊會點！返咗香港科技大學做兼任教授的財經事務及庫務局前局長陳家強，尋日出席由香港管理專業協會工商管理研究社所舉辦嘅「中美貿易戰對本港的經貿影響」論壇時突然爆Seed，鬧爆特朗普，直指中美貿易戰唔單止係經濟上嘅角力，而係美國對中國進行「冷戰」嘅開始。
「睇吓呢條友可以撐幾耐」
陳家強話美國自二○○一年嘅「911」恐襲後，由多邊主義趨向單邊主義，唔容許有其他國家挑戰美國嘅經濟地位同實力，加上美國喺政治、軍事、經濟等方面嘅單邊主義抬頭，美國已逐漸演變成「American first」（美國人優先）。跟住佢仲講到根據特朗普嘅背景，直斥特朗普係一個種族歧視嘅人，認為佢一定唔會想中國崛起，從佢競選時嘅言論開始，睇埋佢政府嘅班底，可見貿易戰並非單純嘅經濟角力，而係對中國進行「冷戰」。不過，佢話呢種思維只係代表緊美國某部分人嘅心態，而目前美國嘅形勢其實並唔穩定，中國同香港大可以靜觀其變，「睇吓呢條友（特朗普）可以撐幾耐！」睇嚟冇做官就冇包袱，所以佢可以講得咁放嘞！
出席論壇嘅香港中文大學商學院院長陳家樂、香港工業總會主席郭振華、香港中華廠商會聯合會會長吳宏斌，佢哋一致認為特朗普難以預測，「唔知佢仲收埋幾多張牌」，其中陳家樂認為特朗普唔會輕易罷休，中國要有一啲自保嘅政策，例如出招吸引更多外來投資，或者放寬貨幣政策，以抗衡特朗普造成嘅多項不明朗因素。
吳宏斌憂對港商打擊沉重
吳就斥特朗普明顯有意「做低中國」，而中美貿易戰愈拖愈長，搞到好多港商都唔知點做，特別係難以撤廠嘅中小微企，長遠嚟講會造成好大打擊，嚟緊睇吓會唔會多啲喺東南亞發展。郭就希望香港可以堅持獨立關稅，而內地都要諗定對策，透過新政策幫助業界發掘新嘅市場，以應付特朗普層出不窮嘅「亂招」。