中環出更：區諾軒劍橋踩車 批港共享單車冇泊位
共享單車登陸香港後，經常見到有唔少共享單車隨街泊，搞到周圍立立亂。立法會代表團日前去英國訪問，抵埗後唔少議員借半日偷閒出去走走，其中議員區諾軒更租單車踩去英國名牌學府劍橋大學添！佢見到當哋有系統規劃，共享單車唔會通街泊，覺得香港應該要改善吓泊位問題喎。
大讚倫敦系統成熟
區諾軒喺Facebook發貼，話一直喜歡睇大學社區，甚至到社區內的舊書店閒逛，而劍橋作為英國僅次於牛津歷史悠久嘅學府，想去睇吓校園內嘅歷史建築，但由於車站距離劍橋大學校園頗遠，所以租單車踩入去周圍睇，仲話如果冇單車，難以喺一日內行完整個劍橋社區。
佢又話近來旅行都喜歡踩單車，好處係可以在有限時間內走更遠的路，大讚倫敦有成熟的共享單車系統，連校園內都會見到共享單車出現，但反觀香港冇指定停泊位，就最需要改善。佢舉例，倫敦要喺指定位置取車，日本則擺設共享單車點，認為唔同地方用唔同方式規管，正係為咗減少誘因令人隨處泊單車喎。
卓妮