中環出更：照顧腦退化 林正財：要當長者係BB
香港將迎來高齡海嘯，愈來愈多人認識腦退化症，要喺生活中主動去幫忙同照顧。賽馬會「腦動耆跡」計劃尋日舉行閉幕禮，安老事務委員會主席林正財就話面對人口老化，市民將會更常遇到長者需要幫忙，好似平時見到BB或小朋友走失，大家都識得處理，希望社會各界對待長者好似對待小朋友，知道點去幫助腦退化患者，唔會感到陌生。
林正財又話照顧者壓力好大，經常擔心長者走失，但都唔應該鎖佢哋喺屋企，只要做好友善社區工作，腦退化患者一樣可以行商場或搭公共交通工具。而佢自己每星期都會踩二百公里單車，保持身體健康兼預防腦退化添。
徐英偉鼓勵父母打牌練腦
在場嘅勞工及福利局副局長徐英偉就話，雖然政府經常落後於賽馬會少少，等到部分計劃成功先接力去做，強調未來只要有空間都會盡力做。佢認為市民對腦退化有更深認識，但如何識別、如何處理等，仍有好多工夫要做，好似林正財所講，要將長者視為小朋友，走失唔緊要，大眾要學識同佢哋溝通，幫佢哋返屋企。
徐英偉又透露，有一位已離世家人生前都患有腦退化，令佢體會到照顧者嘅憂慮，所以佢不時會「捉」兩個仔同父母玩桌上遊戲，又鼓勵父母打麻雀訓練腦部預防患病。香港賽馬會慈善事務部主管（長者及家庭）陳載英都認同，話打麻雀的確可以鍛煉腦部，再加上多休息，少啲壓力就無咁易病！
擔任活動「耆跡天使」嘅輪椅劍擊運動員余翠怡話，試過喺港鐵站遇到一位患腦退化的婆婆與家人走失，之後佢花時間陪婆婆「尋親」，終可與其女兒見面團聚。佢話呢件事後反思過，如果自己親人患病走失，會有幾無助，故更希望社會認識多啲及幫更多人。
卓妮