政情：葉榮枝盼台式飲品 吸引青年飲茶
近期周街都開滿台式飲品舖頭，其中以珍珠奶茶最受歡迎。香港茶文化院院長葉榮枝就認為珍珠奶茶可以增加年輕人對茶嘅興趣，減低佢哋對茶嘅抗拒，但佢自己有底線而唔會飲喎。
葉榮枝認為珍珠奶茶、生果茶等為年輕人接觸茶嘅入門途徑，當佢哋口味變化，好似唔想飲太甜，就有機會回到傳統茶上。不過，佢自己就唔會飲，因為自己有底線，唔飲香精、糖精等化學成分，同埋要清清楚楚知道自己飲緊乜。
玩創新 茶溝果汁或酒
雖然佢接受唔到飲珍珠奶茶呢類飲品，但唔代表佢就好死板，因為佢都有研究創新，將茶溝果汁或酒，不過就堅持唔加防腐劑等化學物質，同埋要視飲茶係一種品味同埋生活藝術咁話，所以無論飲嘅茶價錢如何，都一定要認真咁飲喎。