有本小說係咁寫嘅：「醫生有三種境界：第一種治病救人，第二種要有人文關懷，第三種能夠成為病人精神支柱。」可惜吖，部分公立醫院嘅醫生連救人治病都做唔到，醫療事故層出不窮，呢種醫生到底屬於乜嘢境界，大家心照喇。
話口未完又有一單疑似誤診嘅事故嘞。話說有位女士嘅德籍老公，兩年前因為發高燒、腹瀉、傷口膿腫，被送去仁濟醫院治療。期間病人要求院方幫佢洗傷口，但醫護人員冇理會，淨係抽取傷口樣本化驗，最後懷疑係肺動脈栓塞。點知入院短短四粒鐘病情急轉直下，乜嘢詳細檢查都未做啫，病人就一命嗚呼，話係死得不明不白都冇誇張。
遺孀事後取得嘅化驗報告，隻字無提肺動脈栓塞，反而話病人身上多處傷口帶有惡菌，相信受食肉菌感染併發敗血症身亡，醫護人員係咪斷錯症引致延醫，好難唔令人懷疑。不過唔使多講，公院永遠唔會認衰，例牌話畸士轉交死因庭就關人個關。
雖然話，病人感染食肉惡菌，極短時間足以致命，但若然醫護人員能夠及早作出正確診斷，把握治療黃金時間，未必救唔番，最起碼令家屬及病人了解病情，唔使死咗都唔知咩事。仲有，呢單畸士有好多甩漏，例如病人想洗傷口，醫護人員只係抽取樣本做化驗就算。又例如量血壓嗰陣，話病人體形大，搵唔到合適工具就不了了之。所以話，公院亂象只有你諗唔到嘅，絕對冇佢哋做唔到，就係咁解。
這些年，公院醫療事故不絕如縷，唔係斷錯症、開錯腦，就係打錯針、輸錯血，再唔係就左右調亂、陰道肛門不分，點樣旨意佢哋醫好病人呀？好似今次不幸喪夫嘅女士咁吖，講明對公營醫療失晒信心。有人形容，病人一隻腳踏入公院，另一隻腳就踏入鬼門關，唔係冇道理o架。
最離譜係，公院就算大鑊爆完又爆，一樣無人需要問責，最叻就係成立調查小組敷衍輿論，大不了將個案呈交死因庭，結果多數裁定死於不幸，再掟一堆改善建議了事。冇錯，公院醫護人手長期不足，十個煲七個蓋，的確好難做到盡善盡美，但講到底，公營醫療亂象多不勝數，醫者失去父母心、醫醫相護至係致命傷。唔使講咁遠，早排有位名醫做做吓手術，竟然丟低病人去私院(手爪)真銀，事後話就話被大學炒魷，但轉個頭就去咗大學旗下嘅深圳醫院繼續搵錢，唔到你唔服。
睇到喇，醫醫相護嘅陋習根深柢固，醫生犯錯唔使受罰，想減少醫療事故都難。喺港府放任自流下，基層病人只能自求多福咯。