政情：公民講場：羅致光談增產假 默認當年隨口噏

香港現行嘅十周產假已沿用多年，最近政府終於研究延至十四周。不過十四周其實都唔多，勞工及福利局局長羅致光尋日喺網誌講起，歐洲有啲國家有一年甚至兩年法定產假，嘩！咁點解香港都仲係傾緊十四周咁少？羅話外國係用社會勞工保險嘅方法，稅制都係「隨收即付」，即係喺打工仔出糧時就扣咗先，要套落香港好困難。羅又自認以前做學者時研究過「隨收即付」，仲主張可以喺香港實施，但係今日自己都只能點到即止喎！其實羅已唔止一次默認自己未入政府時，對多項政策噏得就噏，唔通佢驚畀人抽秤，所以又玩自爆？