政情：劉燊濤愛清酒 考埋唎酒師
鍾意飲酒，可以去得幾盡？香港表廠商會副會長劉燊濤（Gary）鍾意飲清酒，無論係食中、日、韓甚至西式食物，都可以搵到適當嘅清酒配搭。早前佢更加去上堂，考埋「國際唎酒師」資格，即係等於葡萄酒世界嘅品酒師資格，唔通佢想進軍餐飲業？
細個討厭 去酒廠一試改觀
Gary笑笑口話唔係，只係想去餐廳時唔使聽晒侍應介紹，自己可以決定點樣配酒。雖然佢依家好鍾意飲清酒，但其實細個時好討厭清酒，同父母去日本餐廳食嘢時寧願飲啤酒。直至有一次同太太去日本北海道玩，期間參觀一間酒廠時，見到有好多唔同嘅清酒畀人試飲，有啲免費，有啲要收費，佢試咗一啲要收費嘅酒之後，對清酒完全改觀，自此就愛上喇！
香港地，飲紅、白酒或威士忌係主流，Gary都話身邊朋友好似只得佢飲清酒。今次上堂好多同學都從事餐飲業，只得佢係業餘，不過考到牌都好開心，笑稱點都叫做有張沙紙傍身喎。