政情：違泊鬧抄牌警無禮 區鎮樺畀網民圍剿
民主黨（白鴿黨）大埔區議員區鎮樺日前喺佢Facebook專頁上，講述遭無禮貌警察抄牌事件。不過此貼一出即惹來反彈，唔少網民派「嬲嬲」，更有人批評佢「違泊仲聲大夾惡，不知所謂」，質疑佢作為區議員係咪有特權喎！
稱會致電向其上司投訴
區喺貼文中講述事情經過，話日前佢同辦事處職員喺沙田碩門邨做嘢，將座駕泊喺一個避車處，點知做完嘢想離開時，遇上警察無禮貌大叫佢哋離開，佢哋聽完繼續將手推車放入車內，該名警員隨即話「喂，走啦」，然後二話不說就抄牌。區批評該警員唔識乜嘢叫禮貌，其後向該警員隸屬嘅警署投訴，仲話今日（27日）會再致電涉事警員嘅上司投訴。
區接受查詢時強調，喺事發時冇透露自己係區議員，只有投訴時先至提到。佢形容該名警員係呼喝佢哋離開，並非勸喻，擔心市民隨時會遭警員無禮對待喎。至於違例泊車方面，佢就認衰會承擔責任，仲同受影響嘅市民致歉。