政情：泛民謀閂建制水喉 隨時錯殺無辜
區議會撥款係屬公帑，過去審計署曾批評區議會審批活動撥款時有利益衝突。翻查區議會嘅申請撥款紀錄，有唔少都係用「居民協會」呢類地區組織申請，而且過去都有區議員擔任相關組織嘅顧問。有民主派認為依家嘅撥款條例有漏洞，密謀喺嚟緊嘅深水埗區議會大會上，提出修訂撥款準則條例嘅動議，要求將「地區組織」列入不獲撥款類別，實行閂建制「水喉」。
根據現行嘅《深水埗區議會社區參與計劃撥款準則》，非政府機構可以直接向區議會申請撥款資助，但係立法會議員或區議員辦事處、政黨或政治組織，唔會視作非政府機構，即係冇得申請。以前有候選人掛地區組織牌頭參選，之後就用地區組織名義向區議會申請撥款。
要求地區組織列不獲撥款類別
民主派今次所提出嘅動議，打算將地區組織加埋落去非政府機構，不過就只係維持一屆。換言之，如果相關組織喺來屆冇參選，到時就可以申請番撥款。今次行動將會係繼取消授權票之後，民主派再一次密謀改變現有遊戲規則。
有份提出動議嘅民協深水埗區議員楊彧就話，近年建制派經常利用地區組織申請撥款搞活動，變相係將區議會當做提款機作政治宣傳，覺得呢個漏洞係幫佢哋「度身訂造」。不過一旦動議獲通過，民主派同樣都會受條例影響喎，楊彧就斷言冇影響，就算有都係屬正面，覺得今次動議係釐清番灰色地帶，喺申請撥款上公平、公正咁話。
有不具名建制派人士就批評，呢個動議係將撥款申請政治化，會對個別申請組織唔公平，認為撥款申請應該係根據項目對社區有冇幫助，而唔係睇吓屬邊個組織。同時，有啲議員會參加唔同組織，但多數唔係骨幹成員，甚至參選時都唔會掛上相關組織牌頭，冇理由咁都要遭到抹殺。
其實有啲建制派已經為避嫌而退出組織，同時有啲泛民地區組織都會申請撥款，泛民如果想堵塞漏洞，都要用吓大腦先得o架，玩一刀切，隨時錯殺無辜。