中環出更：葉劉炮轟樹木辦葛文琪 高韻儀卸責
早幾日秀茂坪發生塌樹擊斃途人意外，雖然呢類事件唔係成日有，但一旦發生後果都好嚴重，所以政府早喺十年前成立咗樹木管理辦事處，專責處理樹木問題，不過似乎冇乜成效。行政會議成員、立法會議員葉劉淑儀尋日（26日）都喺Facebook炮轟發展局綠化、園境及樹木管理組主管葛文琪同樹木辦總監高韻儀，鬧佢哋意外發生至今都冇出嚟解畫，只係將責任推畀一個助理秘書，直斥葛、高兩人可恥。
斥政出多門 欠缺專家
葉太又逐點批評樹木辦做唔到嘢嘅原因，首先係「政出多門」，話樹木辦只係負責協調唔同部門，真係塌樹嘅時候可能涉及房屋署、康文署、路政署、民政署、消防處等多個部門，而且各部門經常「用顯微鏡檢視過」係咪自己負責先去處理，搞到發展局同樹木辦都難以發揮作用。
其次係政府內部根本就冇樹木專家，目前葛、高兩人嘅專業資格分別係城市設計及土木工程，同樹木管理無關。葉太仲話香港其實係有樹木專家嘅，不過政府嘅職位實在係「無兵司令」，單靠一人根本解決唔到問題，所以一直都請唔到人，就算請到啲人都走得好快，反建議發展局不如開設一個樹藝師職系，請啲專家去培訓人才好過啦！
卓妮