中環出更：黃進達慨嘆飲茶「講究」變「講急」
香港人飲茶喜歡一大壺、一大杯咁「豪飲」，但喜歡茶嘅人，就鍾意細細杯「慢慢嗒」，感受茶香及嘴內回甘嘅感覺，好似飲功夫茶咁。香港旅遊業議會主席黃進達（Jason）尋日出席活動時就話，屋企人都有飲茶習慣，但已由以前講究點沖茶，到今天好趕急飲兩啖就要出門口，嘆時代已改變。照佢咁講，飲茶咪由「講究」變「講急」？
Jason又話，以前周圍去發掘新景點時，都會睇吓啲茶農點樣製茶，例如杭州茶農真係用手落去炒，而印度亦有長遠同深厚嘅茶文化，總之每個地方都有不同。同場嘅立法會旅遊界議員姚思榮都愛茶，早些年經常喺屋企沖功夫茶，但近年胃不太好，依家見到茶都唔太敢飲。
許百堅話功夫茶重溝通
作為資深茶客，姚思榮更帶埋議員謝偉銓及何君堯一齊去品茗功夫茶。理工大學中國商業中心導師許百堅就邊沖茶，邊將功夫茶文化娓娓道來。佢話飲功夫茶並非着重茶，而係人與人之間嘅溝通同交流，不論多少人在場，每次都只係沖三杯，唔夠飲，大家互相請來請去，就係最好嘅互動啦！講講吓，佢仲教謝偉銓同何君堯沖茶，兩人動作雖然生硬，但都有模有樣。
講番尋日活動係盂蘭文化節閉幕，期間仲舉辦搶孤公開賽同邀請賽，一眾議員及名人嘉賓都有落場。立法會議員隊十分落力，台上拋孤時，每拋一下都吶喊助威。議員陸頌雄有份喺台下搶孤，佢以身高嘅優勢，睇準米袋後，輕輕一舉就接到孤喇！
卓妮