除惡務盡，斬草除根，呢個道理怕且唔使人教嘞啩。可惜吖，港產官僚正一牛皮燈籠，點極唔明，淨係清拆深水埗通州街天橋底「南亞村」嘅木板屋咋，拆啲唔拆啲，結果拆極都有。睇怕唔使幾耐，吸毒特區、槍械庫、黑幫開壇收兵又會死灰復燃咯。
嗱，經過正義傳媒鍥而不捨追蹤揭露南亞村種種駭人亂象，社會嘩然，輿論鞭撻，特區政府終於知衰，連日來食環署、民政事務處及警方派出數十人浩浩蕩蕩入村拆屋。不過咪睇當局係威係勢咁款，查實做騷咁做，一日拆兩間，另一日拆六間，做完幾場大龍鳳，仍然有十六間木板屋屹立不倒，清拆無期，問你服未。
話說當局選擇性拆屋，原來又係欺善怕惡嘅劣根性作祟，事關執法隊伍只揀冇人嘅吉屋嚟拆，頂多拆埋警方執過法已圍封嘅木板屋，其餘有南亞兵團進佔嘅就當睇唔到，咁咪即係嘥氣。期間南亞兵團及疑似黑幫分子仲企喺一邊虎視眈眈𥄫到實，食環署一干人等嚇到發軟蹄，邊個係兵邊個係賊都未搞清楚，南亞村拆之不盡就係咁解。
講到呢度，功夫茶不期然諗起，食環署對付手無縛雞之力嘅阿婆阿伯，一夫當關、萬夫莫敵，唔知幾咁勇猛，偏偏對住南亞兵團就英雄氣短、手震腳軟，有冇再失威啲呀？
正所謂野火燒不盡，春風吹又生，當局拆啲唔拆啲咯喎，半途而廢咯喎，擲煲唔擲蓋咯喎，一陣風過後南亞村咪捲土重來囉，仲分分鐘變本加厲，區區橋底都有，到時南亞兵團進駐橋底成一統，想拆都難。有人預言，南亞村遲早同港獨合流，威力倍增，到時點止成立香港國吖，成立南亞國都有之！
區議員就講得啱嘞，當局拆村有頭威冇尾陣，即係姑息養奸，為假難民同犯罪分子提供藏身之所啫。查實區議會一早掌握露宿者數據，當局要跟進冇難度，擔心拆錯露宿者個竇擺明係藉口。所以話，南亞村呢個治安毒瘤愈養愈大，咪就係港府畏首畏尾惹嘅禍囉，任由南亞兵團同黑幫圍威喂，遲早爆大鑊都似，最怕升級成為恐怖分子鐵竇，咁就冚包散嘞。仲有呀，南亞村附近嘅通州街公園針筒亂扔，萬一有細路仔拮親，後果可大可小o架。
真係諗極唔明，香港話就話已經回歸，叫做港人治港當家作主，但實情係恐洋懼外嘅DNA深入骨髓，歷百年而不衰，特區政府唔止對住「正宗」紅鬚綠眼嘅洋人抬唔起頭，連對住南亞假難民都好似驚佢有牙咁款。由南亞村自成一國到外國記者會公然提供播獨平台，特區政府完全冇符，話香港冇治外法權，搵鬼信咯。