政情：民主黨同傘兵撞區鬧翻 柯耀林面臨退黨
區議會換屆選舉將於明年舉行，各黨派都密鑼緊鼓協調人選。喺泛民方面，有消息指民主黨同傘兵組織、將軍澳民生關注組喺將軍澳出現撞區而鬧翻。據知民主黨昨晚召開中委會會議，討論將關注組列入黨內嘅「政治組織」名單上，而該黨本身唔容許有雙重身份。換言之一旦通過，首當其衝受影響嘅，將會係曾經同民主黨前主席劉慧卿一齊參加立法會選舉嘅柯耀林。佢依家除咗係民主黨黨員，同時亦係關注組主席，因此佢喺兩個身份上需要作出抉擇。
黨員唔容許有雙重身份
將軍澳民生關注組本身由唔少民主黨成員組成，喺黨內屬「地區組織」，因此民主黨黨員可同時擁有雙重身份。事緣關注組成員、區內業委會副主席李柏棠同埋民主黨成員莊榮輝同樣有意喺西貢都善選區出選，但由於雙方傾唔掂數，加上黨內有人提出動議，所以中委會將議案列入議程討論。
同時，民主黨有唔少黨員都有「雙重身份」，另一例子就係沙田區議員丁仕元，佢喺上年年底聯同多名沙田區議員組成「沙田區政」，而且仲做埋召集人。所以一旦中委會通過議案，分分鐘可能會令其他雙重身份嘅民主黨成員受牽連，隨時會引發另一場退黨潮。