政情：要搵公務員暫任 故宮館長冇人肯做？
西九文化區香港故宮文化博物館（故宮館）預計二○二二年落成，工程未見阻滯，但招聘館長就似乎唔多順利。西九文化區管理局尋日宣布借調康文署副署長（文化）吳志華，出任故宮館嘅暫任館長一職，九月十日履新，為期六個月，管理局行政總裁栢志高就承認招聘館長嘅過程較預期需要更長時間。莫非呢個職位吸引唔到人嚟做？
栢志高：招聘程序繼續進行
故宮館董事局主席陳智思大讚吳志華對香港嘅博物館，以及同故宮博物院合作有豐富經驗，認為對方被借調故宮館，可以推動故宮館嘅籌備工作，包括日後展出故館藏品嘅安排，以及喺策展方面提供意見。
真正嘅館長幾時上任，栢志高只係交代話招聘程序將會繼續進行，而喺館長搵到人之前，故宮館會開設暫任館長一職，以擔任領導角色喎。不過，要靠公務員體系嘅吳志華頂替暫任館長，究竟係故宮館館長一職無人問津抑或人選唔啱心水呢？