政情：今日你上鏡：學南韓議員做心形手勢 葉建源似問人拎錢
南韓國會副議長李柱榮（Mr Lee Ju-young）前日嚟香港同一班立法會議員見面交流，雖然佢哋傾咗唔少南北韓局勢等觀點，但係出席嘅議員睇嚟最回味嘅，係李柱榮教佢哋嘅潮流心形手勢，有份出席嘅會計界議員梁繼昌（Kenneth）仲笑教育界議員葉建源做得唔好，手勢好似問人拎錢咁。
大談南北韓政局
出席嘅議員仲有醫學界陳沛然同區諾軒，葉建源喺Fb放咗佢哋一齊做心形手勢嘅相，佢話會面期間李柱榮講咗好多南韓國內兩大黨嘅政見異同，同埋南北韓同國際關係等觀點，而影合照時，對方主動舉起心心手勢，仲話「I love Hong Kong」，葉建源就話港人鍾意睇韓劇，去韓國旅遊，或者大可禮尚往來，議員亦回以「We love Korea too」。
之不過，葉建源嘅手勢可能唔得正宗，被Kenneth恥笑係「好似問人拎錢咁」，Kenneth亦自嘲依家先接觸「心心手指」，好彩自己學得似模似樣喎。