政情：邵家臻預佔中案坐監 密袋捐款找數

佔領行動係由「佔中三子」戴耀廷、陳健民同朱耀明發起，當中陳、朱二人喺一六年底成立咗基金，為社民連梁國雄（長毛）、香港眾志羅冠聰、劉小麗同姚松炎被取消立法會議員資格（DQ）籌訟訴費，騎劫咗多個遊行籌款。到啲DQ案搞得七七八八，基金又話要幫佔中九子案籌款，仲有其他「政治案」要幫拖等，總之無所不用其極去掠水，等市民為佢哋埋單找數。

邵前後收57萬 未見陳淑莊申報

根據立法會議員個人利益登記冊，邵家臻最早喺舊年七月申報，自己係基金同「核心價值基金」可能受益人，同年十一月，佢分別收咗基金十萬元及核心價值基金約十七萬元。到今年四月及七月，佢又收咗基金十萬元及廿萬元。數數吓，佢前前後後都收咗五十七萬元，反而未見陳淑莊有相關申報。

問番邵家臻收咁多錢會做乜？佢就解釋，款項用作打官司，已經全數交予律師，強調有收據兼不經個人戶口，基金向涉案九人每人提供四十萬元，另外核心價值基金嘅款項，只係專業議政籌款捐助佢嘅心意。佢又話暑假期間正在準備上庭，會同律師見面討論，而作為社工，永遠都係作最好嘅盼望同最壞嘅打算。

佔中三子當初講明會承擔罪責，但被檢控後即刻變臉，擺明係去飲唔找數，依家齋計邵家臻都收幾十萬元，九人加埋起碼要使三百多萬元，相信基金好快就見底，到時又會無限輪迴，掠水、使錢、再掠水，變成無底深潭。