中環出更：王坤飲茶相 揭房協新主席
香港房屋協會下個月換屆，新主席原本篤定由房協副主席梁國權接任，但身兼港鐵行政總裁嘅梁因身陷港鐵沙中線造假醜聞而提早退休，早前已肯定唔會角逐。咁到底邊個會接掌房協呢？公屋聯會前主席王坤就用一幅舊相，話你知答案。
王坤喺Facebook上載咗一幅今年初飲茶嘅舊照，同行茶友正係房協主席鄔滿海、房協審核委員會主席陳家樂，同埋身兼房委會成員嘅城大公共政策學系學者劉國裕。王坤留言話「新任主席應是眾望所歸，心水人選可在相中尋」，又話自己冇份。早前傳出過陳家樂係接棒熱門，唔通已經成事？
承認陳家樂接任
王坤接受本報查詢時，笑言「都係陳家樂（接任房協主席）o架啦」，又話早喺九十年代已經同對方喺房委會合作，佢話雖然未必認同陳家樂一啲理念，但係覺得對方處事公正。佢又話四個係老朋友，每一年都會相聚飲茶，傾吓香港房策咁話。
卓妮