中環出更：推灣仔美食地圖 伍婉婷唔驚半夜餓親
香港被譽為「美食天堂」，商、住、旅遊集於一身嘅灣仔區更加係食肆林立。灣仔區議會同聖雅各福群會近日就製作咗專攻灣仔嘅飲食文化地圖，介紹灣仔飲食文化。灣仔區議會副主席周潔冰同當區區議員伍婉婷（Yolanda）都大讚灣仔乜都有得食，夠晒方便。Yolanda仲講笑話，灣仔有啲食肆開到好夜，甚至夜晚先營業，就算大肚婆半夜想食嘢，老公都唔使漏夜揸車周圍搵食喎。
Yolanda話灣仔食肆夠晒多元化，不論瞓醒想食辣嘢定印度薄餅，都可以食得到。佢仲話灣仔有間夜晚先營業嘅拉麵店，平時就算佢喺議員辦事處做嘢做到好夜，都可以去食拉麵，唔驚餓親。佢又自爆有段時間腸胃唔好，就聽朋友講進行食療，只食生果、糙米同薯仔，有次區議會外出視察，之後一班同事一齊去食海鮮，佢就只能食自己帶嘅一盒薯仔，結果「笑死咗全世界」。
年輕人開店 歐陽應霽照捧場
負責編寫灣仔飲食文化地圖嘅飲食旅遊作家歐陽應霽就話，雖然佢係飲食旅遊作家，但都冇特別門路，主要都係靠豎起耳仔聽朋友推薦食肆。咪以為佢只係去名店，年輕人開嘅食肆佢都會捧場，佢話即使嗰啲餐廳唔係最好，但都要了解下一代嘅口味。而為飲食地圖繪製插畫嘅本地藝術家章柱基就曾經喺灣仔返工，而獲邀繪製插畫時適逢喺日本深造，即時勾起灣仔美食嘅回憶咁話。
多好嘢食，都要食得健康。為咗宣傳少鹽少糖，食物及衞生局局長陳肇始尋日示範一道以藜麥同豆腐為主嘅沙律。平日甚少煮飯嘅佢，被問到有乜撚手小菜，佢笑稱「冇嘢叻」，喜歡煲湯同榨果汁，最鍾意煲番茄薯仔湯，因為貪方便，將啲材料放晒落去就搞掂。
卓妮