職場健康：長時間搬重物 慎防足底筋膜炎

子安︰「唉，啲嘢好重呀！你咪掛住玩電話啦，幫手拎啲啦！」

爸爸︰「子健幫吓子安手啦！你返工嗰度應該都有教你盡可能減少攜帶重物o架喎！因為長時間咁做會令足部承受壓力，好容易會有足底筋膜炎o架！」

子健︰「好，不過減輕體重都係減輕足部承受壓力嘅方法嚟，子安不如拎多少少當減吓肥啦，肥仔！」

子安︰「你拋書包呀？我上星期啱啱上完職安局嘅體力處理操作合格證書課程，導師話我哋唔應該搬運過重而遠超個人能力嘅負荷物，你幫手拎啲啦！」

爸爸︰「睇嚟你兩個都識唔少嘢，仲有冇其他相關知識分享吓？」

加鞋墊減壓 多伸展腳部

子健︰「大把，例如着舒適及輕便嘅鞋。着鞋底較軟、吸震能力較佳嘅鞋，可以減少行路時引致嘅震盪。如有需要，可以喺鞋內放入適當鞋墊減輕所受壓力。」

子安︰「同埋避免長時間站立或者行走，一段時間後坐低休息吓或者進行一啲足部運動，例如︰小腿肌肉伸展、腳踝同腳掌運動等。」

子健︰「仲有呀！如有需要，可以使用手推車或者其他輔助設備運送重物添！好心爸爸你唔好慳埋慳埋，買番架車仔喺屋企看門口啦！」

爸爸︰「唉……又要使錢……但為咗令我哋一家人每一步都行得健康啲，呢啲錢係值得使嘅！」

職業安全健康局

www.oshc.org.hk