人哋去旅行就話去到盡啫，點知國泰航空就諗縮數諗到盡，家陣為咗賣多幾張機票，不惜度出夾硬增加客機座位嘅屎橋。唔怪得有人話，國泰服務水準江河日下，連廉航都不如啦。
嗱，國泰幾個月前開始陸續為旗下波音機隊經濟艙進行改裝，將原本每行九個座位，夾硬插多個位落去，變成每行十個，搞到每個座位闊度由十八吋半，勁縮到得番十七吋左右，肥啲都坐唔落。乘客多咗，變相令每人擺放行李嘅空間減少咗，結果乘客媽媽聲之餘，仲因為行李寄艙問題而屢次令航班延誤，呢啲咪叫因小失大囉。
係人都知，經濟艙座位出名窄，依家窄上加窄，乘客膊頭撞膊頭，隨時引爆口角嗌霎。仲有喎，乘客數目多咗，空服人員數目並無增加，即係做死一班空姐空少啫，一陣派餐派慢咗，分分鐘畀人投訴都似。最衰係國泰唔止要乘客做沙甸魚，仲想訓練乘客做「忍者」，事關洗手間照舊維持六至七個，想唔出現「作肚痛，去廁所排長龍」就有鬼咯。你話喇，國泰見錢開眼，玩客又玩員工，令原本已經甩晒色嘅招牌更加不堪，都唔知有乜為。
不過諗落又冇乜出奇嘅，國泰之前炒燶期油，狂蝕超過八十億元，到家陣仲係流血不止，兼折墮到被踢出恒生成分股添，自然要諗計填番條數，一時大裁員，一時重整海外架構就係咁解。今次「劏位」開源，出盡陰招損客，無非想賺得一蚊得一蚊，話之乘客有幾難受吖。好彩，香港係自由社會，勝在有得揀，既然國泰Cheap成咁，乘客使乜貼錢買難受呀，質素好過佢嘅航空公司固然大把，機票平過佢嘅廉航亦唔少，點解要搭國泰呀？唔通真係自虐狂咩。
係呀，人們眼睛雪亮，國泰愈做愈燶已經有目共睹。好似日前出爐嘅本年度最佳航空公司排名吖，國泰由去年第五跌落第六，已經連續四年下跌，呢啲咪係不思進取、醜出國際嘅鐵證囉。有人預測，不出幾年國泰就會跌出榜外，仲要係影都冇嗰隻，雖不中亦不遠咯。
冇計喇，國泰管理不善，事故無奇不有，機件故障中途急降有之，機師漏帶航圖折返又有之，甚至當乘客人球咁踢，超賣、延誤當食生菜，試問今時今日咁嘅服務態度，點會唔趕客吖。再咁落去，畀人徹底唾棄係遲早問題咋。
花無百日紅，人無千日好。國泰由小型航空公司，成為國際知名嘅大型航空公司，本來係香港嘅光榮，可惜國泰不知自愛，店大欺客，終於盛極而衰，成為香港之恥，講到尾係咎由自取咋。