林鄭月娥一如以往幾任特首，對房屋問題一籌莫展，覓地建屋無能，她上台後公屋平均輪候時間創下五點一年新高，加上其房策本末倒置，鼓勵市民置業多過起公屋，搞到家陣「公屋等到死、居屋爭崩頭、私樓買唔起」嘅局面。
一日住屋問題未解決，一日民怨難平息。大家有目共睹，日前房協推出位於香港仔漁光村嘅「暫租住屋」，約二百個單位，租金介乎五百多至一千四百多元，對象係輪候公屋三年或以上的單身長者及二至三人家庭，租期雖然只得五年兼無電梯，一樣爭崩頭。政府為咗安撫等到頸都長仍然上唔到樓嘅基層，可謂挖空心思諗出唔少「好計劃」，例如組合屋、共享屋、暫租住屋，但整色整水炒埋唔夠一碟，相對於近三十萬公屋輪候大軍和逾二十萬劏房戶，有論者形容如「杯水車薪」，依老朽看簡直如「大海撈針」。
事實上，公營房屋單位未來數年平均每年的落成量只有約一萬五千個，遠低於長遠房策訂下每年二萬個的目標。林鄭若真的把房屋問題看成「重中之重」，實在不應一意孤行把新公屋轉為「綠置居」發售，令公屋流轉陷於停頓。
有論者指出，香港到二○三○年的房屋需求高達一百萬個單位，但政府中長期只能提供六十萬個單位，部分新發展區又遭司法覆核，最快也要十年後才有樓落成，問題之嚴峻可想而知。
林鄭早前預告施政報告會重點處理土地供應問題，並稱她個人支持填海。然而土地小組諮詢文件顯示填海造地需時十一年，計埋建屋時間，分分鐘要成二十年！正所謂遠水難救近火，政府若從善如流，收回部分粉嶺高球場用地就快得多，據悉粉錦公路以東約三十二公頃土地，其地下並無東江水管，可以直接建公屋。可惜冇靈魂政府為政靠吹水，不會為民日夜思之，想佢造福一方，發夢冇咁早！