政情：何君堯教路龍鼓灘黑沙醫香港腳
土地供應不足，港府高調提倡填海造地引起各方不滿，而屯門龍鼓灘係其中一個選址。屯門區議員兼立法會議員何君堯尋日實地視察，大讚龍鼓灘沙灘好靚，只係對出發電廠有啲大殺風景，仲教市民善用沙灘嘅黑沙去醫香港腳喎，係真唔真啊？
何君堯話，作為該區區議員，特別關心龍鼓灘發展，又話沙灘黑色唔係污糟，用啲黑沙做熱敷，辣吓隻腳，可以醫皮膚病同香港腳，不過要小心有垃圾。佢又話，如果執靚仔個沙灘，相信呢度會變成假日好去處。至於最近好多聲音反對填海，質疑呢個係唔係造地唯一方法，佢都呼籲大家一齊諗諗兼要「撥亂反正」喎。
研移走牌坊前個垃圾站
另外，龍鼓灘牌坊正在興建，何君堯就話布局唔掂，因為前面有個垃圾站「篤口篤鼻」，會去同村長傾吓移去公廁旁，咁就好好多。佢仲話，呢度衞生環境好唔理想，亦因為四電一腦政策，搞到垃圾車都唔肯清走啲舊電器，變成負累咁話。