政情：侍產假一日都唔應該有 張宇人放狠話吳秋北轟刻薄

反鬧勞工界 苛索無止境

政府早前建議將法定男士侍產假由三天增至五天，期間僱員可獲得五分之四薪酬，而勞工界則反建議，要求假期增至七天兼獲全薪。廿蚊張尋日接受訪問時鬧爆勞工界，「你以為七日佢哋就會收手？」直言要得七日，就會有十四日，之後仲有一個月，然後鬧啲僱主無良，形容勞工界嘅苛索永無止境，所以根本唔應該有侍產假。

對於有意見認為侍產假可以令員工投入工作，提高生產力，佢就大鬧話如果真係咁，點解商界要等到立法先願意實行？佢又舉例，如果一間餐廳嘅大廚同總廚都有侍產假的話，點請人頂替佢哋個位？認為三天侍產假已經要止步。佢更斥責支持增加侍產假嘅人，明言「你夠膽就嚟開食肆，全用你嘅標準，無論工時、工資咩假期都好，全都放入去，你賺到錢嘅話你同我講。」

莫應帆斥「跟時代脫節」

廿蚊張說法「兇狠」，即「辣着」同場曾任立法局、市政局及區議會嘅「三料議員」莫應帆。莫大鬧廿蚊張跟時代脫節，仲講番自己做阿爸嘅年代，「落唔落後啊？」而吳秋北亦喺社交網站發貼，批評「廿蚊張又發作」，話以前有血汗工廠、有童工，譏諷原來以前「張老闆」已行緊「野蠻式資本主義」，但當時「張老闆」都只係BB，又未有妻兒，更非子孫成群喎。

講真嗰句，現今世代生兒育女絕對唔可以好似上一代咁，奉行「天生天養」，如果自己當年冇侍產假，就唔畀人哋有，好比藝人黃子華嘅經典「魚蛋論」，即「我唔要我自己多一粒魚蛋，我要佢少一粒魚蛋」。做議員都係為大眾爭取福利啫，廿蚊張唔使為咗反對而講埋啲咁涼薄嘅說話。退一步諗，唔通做廚就唔會病咩？當大廚請病假時，唔通食肆東主就冇搵人頂替嘅方案？