中環出更：天價起個避雨亭 黃碧嬌嚇到撤
近年唔少政府地區工程備受爭議，而本報早前報道，大埔區議會傾緊一個叫價六百三十萬元嘅天價避雨亭，惹嚟唔少議員同市民投訴造價太貴。件事有最新發展，項目倡議人、大埔區議員黃碧嬌決定撤回建議。到底係愛定責任令佢決定要撤回呢？
黃碧嬌慨嘆，近年工程造價昂貴，形容「睇完嚇到暈」，今次避雨亭更加係冇辦法下先決定要撤回。
填個窿貴多二百萬
佢解釋，最初提出建議時，民政署嘅方案係喺現有嘅避雨走廊旁，增建「L形雨水走廊」，當時叫價約四百四十萬元。不過佢見到中間有個位「通窿」，想搵嘢遮埋佢，就貴咗二百萬元，話「點知填個窿要咁貴」喎！
「天價避雨亭」經曝光及廣泛討論後，佢收到唔少電郵就項目提供意見，又親自到避雨亭附近同市民了解情況，大家都認同現有避雨走廊避唔到雨，覺得有個亭當然係好，但如果咁貴就算數。黃更稱，現時地區工程叫價數百萬至過千萬元都有，今次已係佢第二次撤回地區工程建議，搞到現屆任期內好似冇咩做到，覺得好無奈喎。
卓妮