中環出更：許華傑帶隊赴哈薩克入境被人兇
相信香港人對日本、泰國、韓國及台灣等地方都好熟悉，唔知哈薩克你又知幾多？中華出入口商會副會長許華傑（Michael）早幾日帶一班青年團遠赴哈薩克，佢話自己都未去過，殊不知第一次去就充滿「驚」喜。事關佢哋由烏魯木齊坐火車入哈薩克，一入境就「畀人兇」，一大群哈薩克軍人、海關帶埋狼狗上車，收晒所有團友嘅護照嚟檢查，仲命令佢哋坐喺位度唔准郁，「惡死」到爆，加上言語不通，都咪話唔驚。
Michael仲話，有一個團友手持兩本護照，一本香港，一本外國，最初要求檢查時，呢位團友只係交咗本香港特區護照，但後嚟被搜到本外國護照，班軍人就不斷質問佢。Michael話，唔知班軍人係懷疑呢位團友係特務，抑或想敲詐。好在團中有位旅行社高層George識俄文，同佢哋解釋番之後搞掂咗，總算有驚無險。
坐24個鐘火車 大餅做乾糧
入境只係第一關，食物係第二個難題。Michael話嗰程火車要坐廿四個鐘，即係要喺火車上食兩餐，不過由於程車太少人坐所以取消咗餐卡，佢哋惟有買大量乾糧上車。當中有啲餅成塊臉咁大，入面有啲鹹鹹哋嘅肉鬆，可以點草莓醬嚟食，但食完都唔知係咩肉嚟。
最後落車後都有好多小插曲，例如導遊唔舒服、電話卡用唔到、市集貨不對辦等，但過程總算順利。Michael仲話今次旅程唔係日日有得沖涼，而且晚晚瞓得幾個鐘，去六日好似去咗成個月咁。睇嚟佢返港要好好抖一抖先得喇！
卓妮