環保環保，多少徵費假汝之名而行！大家有眼見，自從實施膠袋徵費後，港府從未停過借環保之名打劫市民荷包，唔止垃圾徵費、膠樽徵費、玻璃樽徵費陸續有來，「四電一腦」尋日仲正式徵費添，結果多款電器即時加價，未見其利，先掠一筆，問你點頂。
呢嗱，基於生產者自付原則，「廢電器電子產品生產者責任計劃」實施後，但凡冷氣機、雪櫃、洗衣機、電視機、電腦、打印機、掃描器及顯示器嘅產品供應商，必須就每件產品向港府繳交十五至一百六十五蚊循環再造徵費。環境局局長黃錦星話喎，唔鼓勵市民搵冇登記嘅收買佬胡亂回收電器，仲話無登記處理四電一腦係犯法，叫大家為環保出分力喎。
係嘅，保護環境，人人有責。為咗換回藍天白雲，市民唔介意付出代價，之不過錢畀咗，係咪等於環保咗先？睇吓今次徵費計劃嘅細節吖，港府有一間指定回收商負責接收舊電器，但安排上門要等幾日，即係話等候期間，新舊電器要同時佔據家中位置，試問香港地有幾多屋企可以同時容納兩部雪櫃、兩部洗衣機吖？雖然另有兩間持牌回收商聲稱提供回收服務，之不過一係要大量回收，一係只收指定產品。所以呢，尋日實施徵費第一日，唔少市民索性將舊電器胡亂棄置喺垃圾站，到頭來更唔環保，你話係咪嘥氣吖。
仲有喎，羊毛出自羊身上，生產商要上繳費用畀政府，自然將成本轉嫁畀消費者，可見所謂生產者自付係假，消費者自付至真。呢，本報記者巡視多間大型電器店，發現四電一腦產品普遍加價兩至三舊水，電視機加價更超過一成。有零售商計過，連同「送新除舊升級服務」收費，市民買一件電器隨時要畀多五舊水，都咪話唔乸脷。
睇到喇，港府就係咁嘅嘞，搞環保淨係識使把口，一味磨刀霍霍向市民，其他嘢就關人個關。淨係話十年減少四成固體廢物吖，由上屆講到今屆，依然停留喺「講者自講」階段，堆填區依然逼爆，焚化爐依然得個噏字。又好似環保署更新優先處理海上垃圾黑點吖，搞咗成年，垃圾黑點竟然不減反增，由廿七個增至廿九個，搞到香港有「垃圾圍城」之危，問你服未。今次四電一腦回收配套天殘地缺，睇怕又係雷大雨小嘅咋。
講到尾，環保唔係做騷，更唔係一味向錢看，源頭減廢、垃圾分類、循環再用、宣傳教育缺一不可，偏偏港府除咗收錢就冇嘢叻。官老爺只知寬己嚴人，毫無責任感，唔怪得做乜都一事無成喇。