乜嘢叫做天生嘅車模材料呢？以現今南韓車模界嚟睇，要成為人氣車模嘅條件必須要有索樣、前凸後趷身材同纖腰，加埋一對長腿就最好。但講到先天具有模特兒質素嘅話，仲要有一樣，就係夠高挑，好似模潘紫熙正正係完美嘅體現，成為車模女神。
唔少人認為模特兒唔一定要樣靚身材正，最重要係夠高挑同有長腿，而隨住車模崛起，唔少人反而覺得樣貌同身材先至係重點。不過如果想成為全面嘅模特兒，始終身材高挑會着數啲，好似喺南韓首爾出生嘅潘紫熙咁，唔單止擁有迷人樣貌，一副火辣身材更係令人心跳加速，佢仲有一項令女士們羨慕嘅先天優勢，就係擁有178cm高挑身材，加埋一對修長美腿，穿上高踭鞋嘅話，簡直係鶴立雞群。
事實上，潘紫熙早已立志喺模特兒界發展，高中畢業後便入讀同德女子大學主修模特兒系，接受專業訓練兼修讀藝術課程，2014年以新進模特兒身份出道，引嚟唔少人注目，同年佢又以車模身份喺釜山舉辦嘅國際車展登場，雖然當時佢嘅衣着唔係好性感，但係憑住亮麗嘅外形吸引一眾攝影師及現場人士嘅目光，名副其實係一鳴驚人。不過，紫熙坦言對當日嘅演出並唔滿意，覺得自己嘅表現太過拘謹，強調以後唔會再犯上同一個錯誤，可見佢對自己嘅要求相當高。
經過呢次大型演出之後，紫熙嘅知名度大大提升，不過大家都估唔到，佢跟住落嚟竟然唔係主力喺車模界發展，反而轉戰攝影及時裝模特兒界，先後為多個服裝品牌及時尚雜誌拍攝照片。其實紫熙呢個決定一啲都唔出奇，皆因佢嘅夢想係成為一位國際級時裝模特兒，而憑住一副標準嘅模特兒身材，佢成功成為著名嘅平面時裝Model，遺憾嘅係一直未能獲得行天橋騷嘅機會。
唔知係咪因為呢個原因，令佢又改變決定，2015年佢再次以車模身份登場，呢次佢以性感低胸大露背迷你裙造型示人，終於讓大家見識到呢位女神級模特兒前凸後趷嘅誘人身材。及後佢又以賽車女郎身份喺賽事上現身，呢次嘅演出令佢紅遍網絡，事關當日佢身穿一套超火辣嘅賽車女郎制服，一對修長美腿夠晒養眼，胸前深溝更係睇到男士們流晒口水。紫熙嘅人氣愈嚟愈高，工作亦愈嚟愈多，接住落嚟先後以Show Girl同展銷女郎等身份喺電競、電子產品、名牌產品等嘅大型活動中出現，而佢每次亮相總會成為鏡頭爭拍嘅焦點。
有人覺得奇怪，點解紫熙好似放棄咗時裝模特兒嘅夢想呢？佢坦言一直以嚟都冇放棄過，只係覺得如果要成為一位人氣模特兒，唔可以局限演出空間，而透過多方向嘅發展能夠令更多人認識到佢。
簡介：潘紫熙不但樣靚，仲身材火辣又高挑，不過佢一直都冇刻意展現誘人三圍，如果大家想欣賞多啲紫熙嘅性感寫真嘅話，就要Click入呢個網站喇！
網址：http://cafe.daum.net/Ringhee
出生地：首爾
身 高：178cm
三 圍：35-24-35
撰文：魂