政情：鄺俊宇去信爭取飲食優惠 盼長者多啲出街
新一屆扶貧委員會（扶委會）將於本月底開會，新任扶委會成員、民主黨立法會議員鄺俊宇（Roy）尋日同傳媒聚會，大談自己加入扶委會嘅工作目標，佢透露以前曾喺為智障人士而設嘅自負盈虧家舍工作，試過以幾包米粉、一罐午餐肉餵飽廿名智障人士，佢又提及近期再去探訪同類家舍，發現資源仍然短缺，希望喺扶委會提出相關問題，當局亦可以增加相關支援。
智障人士同乏支援
Roy續指，長者福利係最迫切需要討論嘅議題，因為依然有長者因為手續繁複而拒絕申請長者生活津貼，而高額長生津嘅資產審查水平亦有改善空間。此外，佢又話近期留意到有連鎖飲食集團為長者提供三蚊折扣優惠，佢已經去信六間連鎖飲食集團，希望佢哋可以為長者提供多啲優惠，從而令長者多啲出街。