政情：九西補選 傳陳凱欣代高永文出戰
立法會九龍西補選將喺十一月廿五日舉行，食物及衞生局前局長高永文一直被盛傳係獲建制派力撐嘅人選。但據知高落場嘅機會渺茫，最近有指建制派正另覓前官員參選。而呢位政界最新傳出嘅建制派人選同高關係密切，就係高嘅前得力助手、食衞局前局長政治助理陳凱欣。惟陳回覆時未有明言係咪參選，只係話佢好尊重高，覺得高係最適合人選喎。
陳認為高係最適合人選
有政圈中人指，陳凱欣被睇好嘅原因之一係女性，倘若被取消立法會議員資格嘅劉小麗喺補選捲土重來，兩女之爭亦唔會畀人有「男蝦女」感覺。而陳曾經做過電視台主播，樣貌標致，有一定知名度，且較劉年輕一歲。不過今年都四十一歲嘅陳就已經結咗婚，並已有小朋友喇！
冇做政助嘅陳凱欣依家係慈善機構嘅行政總裁，早前佢喺書展一個活動上現身，都好受市民歡迎。如果佢參選，其前上司高永文好可能會幫手拉票，分分鐘可以得到高嘅支持者支持。
陳接受查詢就話，佢好尊重高，高一日未有答案，佢一日都會游說高，認為高係最適合嘅人選，希望高最終決定參選，亦希望大家唔好放大其他人選咁話。繼高同深水埗區議員梁文廣後，依家九龍西補選嘅建制派人選又傳出多一人。論牌面，梁睇怕都要等高同陳鐵定唔選先可以執死雞喇！