政情：譚志源跳槽馬會 同梁錦松兩度分手
唔少公私營機構都有興趣招攬前高官，政制及內地事務局前局長譚志源（Raymond）離開政府熱廚房已經一年，啱啱卸任時過檔前上司、前財政司司長梁錦松嘅私人醫療機構任職副主席，但Raymond做咗唔夠一年又再跳槽，同梁錦松兩度分手，今次加盟香港賽馬會出任公司事務執行總監一職，有傳年薪約五百萬元。
喺梁錦松做緊財政司司長嘅時候，Raymond曾經係對方嘅新聞秘書，其時梁錦松捲入偷步買車醜聞而辭職，Raymond其時因為冇提醒梁錦松要申報利益而備受批評，令佢仕途倒退，當時都有考慮過辭職離開政府。
年薪五百萬 統籌對外事務
其後Raymond喺官場拾級而上，做咗政制及內地事務局局長，喺上屆任期完結後，佢喺舊年十月同梁錦松「再續前緣」，但唔夠一年就過檔馬會出任公司事務執行總監，將會喺本月十五日履新。馬會呢個職位其實懸空咗好耐，上一任嘅麥建華已離任近兩年，有傳Raymond嘅年薪大約係五百萬元，相比佢做問責局長時嘅三百多萬元年薪，足足多咗一百多萬元。
Raymond亦都會成為馬會管理委員會成員之一，直接向馬會行政總裁負責，佢嚟緊將會負責馬會嘅策略性發展，例如提升馬會同香港與內地主要持份者之間嘅聯繫，統籌馬會各事務處嘅對外傳訊工作，同埋管理公共事務部、對外事務部同內地事務部，睇落性質同佢做問責官員時都幾相近，唔怪得被馬會睇中啦！
話一定唔參加立會補選
至於政圈盛傳建制派曾游說過Raymond出戰立法會九龍西補選，問佢會唔會參加補選，Raymond就好堅決咁話「一定唔會」，至於年薪係咪咁高，佢就話不便透露啦！講真嗰句，立法會成日拗嚟拗去都冇結果，依家Raymond泊到好碼頭，就自然毋須走入去立法會啦！