中環出更：曾圍堵嶺大校董會 盧藝賢做街工主席
立法會議員梁耀忠（阿忠）有份創立嘅街坊工友服務處（街工），早前爆出阿忠懷疑解僱旗下「勞工組」三名職員事件，之後仲引發逃亡潮，當中有部分仲係執委會成員添！近日街工低調進行執委會補選，新任主席係九十後嘅嶺南大學前學生會幹事盧藝賢，佢喺兩年前曾因嶺大校董會否決成立專責小組檢討《大學條例》，有份參與圍堵校董會嘅，最後仲收埋警告信添！
梁耀忠任執委會成員
之前街工出現退會潮，一下子走咗成廿幾人，令到街工元氣大傷，佢哋喺上月底舉行補選，當中有八人喺臨時會員大會上，分別獲過半數支持當選。街工向來都屬溫和泛民派別，近年唔少後生仔都會嫌傳統政黨太溫和，而盧藝賢喺過去曾經圍堵過校董會，唔通今次搵佢做主席，係想改變街工嘅形象？
今次街工補選，阿忠雖然冇再做副主席，但仍然係執委會同業委會成員，至於內務、外務副主席就分別由鍾淇鋒同梁靜珊擔任。執委會方面，除咗阿忠、盧藝賢同兩位副主席外，仲有蘇耀昌、陳瑞銘同葵青區議員梁志成。
而喺勞工組事件入面，曾被指拒絕公開街工財政狀況嘅業委會，就由兩人增至四人，包括鍾淇鋒、梁志成、蘇耀昌同郭政權。
卓妮