中環出更：容海恩坐月點投票? EQ：靠遙距科技
新民黨立法會議員容海恩（Eunice）前幾日爆出婚訊，政圈更盛傳佢經已有喜，雙喜臨門。消息傳出後，佢尋日同黨友葉劉淑儀等人見政府官員首度公開露面，Eunice未有否認懷孕傳聞之餘，仲一身黑色套裝打扮疑似遮肚，將修腰嘅西裝外套鈕扣扣上，配埋一對粗踭鞋，似乎係默認懷孕傳聞。不過佢喺政總扶手電梯一路走到地下接受訪問期間，未有放慢步伐，仲試過彎腰執起地下嘅文件夾，身手睇嚟相當靈活喎。
Eunice仲話遲啲有婚紗照就會提供，但被問到預產期、作為首位任內懷孕嘅立法會議員感受等問題時，就只係留低咗一句「無回應」就上車離開。喺Eunice未交代箇中細節，已有人關注議員放產假時嘅工作安排，議員葛珮帆（EQ）就打算建議立法會行政管理委員會研究特別投票安排，等議員有特別需要如「坐月」時採用，例如利用科技畀議員遙距發言同投票。
EQ之所以有咁嘅諗法，係因為立法會好難好似區議會咁採用授權票制度，而鑑於今時今日科技咁發達，遙距發言同投票應該係做得到，只要證實到處於遠方嘅係議員本人就得。不過佢都補充話因為未有先例，所以確實點安排存有好多變數，只係覺得行管會可以趁今次機會討論吓應該點做。
謝偉俊稱按議規需親身投票
如果要遙距投票，並唔止要過科技一關，因為根據立法會《議事規則》，議員係必須親身出席會議投票，立法會議事規則委員會主席謝偉俊都話按現時嘅《議事規則》係冇得搞，就算係懷孕呢啲特殊情況都冇例外，但行管會的確係可以研究吓點做，不過外國大部分國會都冇相關安排，都係要親身出席先得，所以香港係咪要喺呢一方面行前一步，就需要詳細研究喇！
卓妮