政情：葉文斌 楊文銳 任回收基金委員
環境局尋日公布新一屆回收基金諮詢委員會嘅成員名單，十九名主席及委員中，民建聯（民記）最少有兩人出任委員，包括屯門區議員葉文斌及前沙田區議員楊文銳，其中前者係新委任，同一個黨兩個委員咁多，到底有咩玄機呢？
民記曾批基金行政費高
其實，回收基金並非第一次同民記扯上關係，五月底嘅時候，民記立法會議員陳克勤曾經喺立法會提出口頭質詢，批評回收基金行政費高昂，關注政府有否檢討有關開支水平係咪過高，仲批評環境局局長黃錦星係大嘥鬼添！聽落真係相當肉緊！
今次最少有兩個民記被揀咗入去回收基金做委員，到底政府係知道自己衰，真心想搵人幫佢睇緊啲去改善情況吖，定係拉兩個民記入嚟，等佢哋都有份睇個運作，咁就會鬧少啲呢？