政情：做主席失發言權 謝偉銓認同梁耀忠？

謝偉銓先細數成績表，包括提出咗十條口頭同書面質詢，亦都加入多個政策事宜小組同法案委員會，睇嚟早有議會經驗嘅佢，上手完全冇難度。十月份立法會復會時，將會重新選出十八個事務委員會主席，唔知佢會唔會爭取呢？

佢就話做或者唔做主席各有好處，唔做主席可以隨心就關注議題發言，不過如果某啲議題對業界有影響，而做主席可以發揮更多作用，佢就會去爭取，就算係法案委員會。佢以前都有做過發展事務委員會主席，同埋其他法案委員會主席。

獻計房屋 促調整抽籤比率

另外，佢又為房屋問題獻計，提出政府可調整資助房屋抽籤比率，提高等候多年都抽唔中人士嘅中籤機率，又建議喺公共屋邨加建組合屋單位等。