政情：邵家臻挑機劉利群落區體驗拾荒
六旬拾荒婦蘭姐日前工作期間將物品放喺北角街頭僅兩秒，即遭食物環境衞生署票控，事件引起各界關注。立法會社福界議員邵家臻尋日發「英雄貼」，公開邀請食環署署長劉利群參與「拾荒體驗學習」，落區做一日拾荒婦，體會拾荒嘅處境，以免食環署職員同基層巿民屢生摩擦。不過，聽聞劉連禮貌講句「收到信喇」嘅回覆都冇，先搞到邵要「搞大佢」逼食環回覆。
事發當日，蘭姐喺北角拉住手推車到附近商舖收集發泡膠箱及紙皮箱，期間佢將一袋物品拖到與手推車不足十五米距離，放喺地上唔夠兩秒，想再轉身返回手推車嘅位置之際，突然有兩位穿着便服嘅食環署職員表露身份，並票控佢喺公眾地方棄置垃圾，要繳交罰款一千五百元。
邵稱係向港府高官學嘢
邵話經了解後，覺得食環署人員喺票控過程有扭曲事實之嫌，上周五（27日）聯同其他民主派立法會議員約見劉利群，包括朱凱廸、張超雄同區諾軒，但係食環至今仍未回應，所以邵先決定將行動升級，邀請劉一齊去拾荒。佢仲笑稱係向港府高官學嘢，以前成日向抗爭者講話「大家調換角色身份就好」，咁依家邀請劉做拾荒，大不了之後議員做番食環人員一日，感受吓執法有幾難喎！
指食環應公開執法準則
就今次事件，佢認為食環署人員對長者同弱者可以更寬容，而且蘭姐拾荒對社會有貢獻，理應獲得肯定同尊重，認為食環應該公開執法準則。佢更稱，蘭姐嘅說法同食環有出入，反問署方依家採取不聞不問，係咪「死撐」緊？
問到會唔會設個限期要求劉利群回覆，邵則稱，「呢啲心照不宣喇」，立法會議員搵官員，唔通要一個月先覆咩？最簡單講句已收到電郵，正在安排時間即可，咁對大家都有個交代，佢強調唔係叫劉要即日做，但起碼畀個期出嚟先。
查實港府唔少政策都成日畀議員話「離地」，做官嘅就好似不知民間疾苦，如果官員肯應允落區，可能會贏到市民些少掌聲。不過邵經常兜口兜面質問班官，今次仲公開邀請做拾荒者，難免令到官員冇下台階，相信呢個「拾荒體驗」成功率唔高囉！