中環出更：容海恩袁彌昌下月奉子成婚
政圈盛傳新民黨立法會議員容海恩（Eunice）同埋該黨政策總裁袁彌昌（Derek）蜜運，但係自從上年十二月傳出緋聞至今，佢哋回應時都表現得好曖昧，冇承認亦冇否認，難怪當時新民黨主席葉劉淑儀都話佢哋「像霧又像花」啦。近日兩人嘅感情有新發展，可靠消息指Eunice已懷孕，二人亦將於下月結婚，連姊妹都揀好埋添。容海恩仲係立法會首位在任產子嘅議員。
Derek接受查詢時承認結婚一事，仲話雙方家長已知悉，依家積極籌備緊婚禮。由於要遷就立法會會期，所以婚禮將會喺暑假舉行。Eunice回應查詢時都話承認婚事，仲覺得好開心添，話自己正值適婚年齡，而且亦係人生必經階段，覺得係喺合適時間做合適嘅事。
與未婚夫妹政見有異 稱要互相尊重
至於被問到係咪有咗，佢就話結婚係兩個人感情嘅事，小朋友嘅事就同結婚冇關。她仲話，一向計劃結婚，唔排除婚後會有BB。雖然佢冇承認有咗，但亦冇否認。講起Derek嘅妹妹係人民力量前主席袁彌明，唔知佢會唔會擔心政見唔同，Eunice回應時就話，結婚係兩個人嘅事，雙方家人都應該要尊重咁話喎。
兩人傳出緋聞至今都只係大約七個月，就極速拉埋天窗，可靠消息話，其實佢哋係因為有咗BB，所以先咁急要結婚喎。
卓妮