中環出更：黃進達囝囝兩月一旅行搭飛機唔扭計
正所謂「有其父必有其子」，遺傳嘅嘢真係冇得呃人。旅遊業議會主席黃進達（Jason）嘅爸爸黃士心係「旅遊教父」就大家都知，Jason早前出席一個午餐會時話，佢即將三歲嘅兒子去旅行仲去得密過自己，差不多每兩個月就會去一次，而且搭飛機好乖唔扭計o架，都叻過佢，佢自爆以前都唔係特別享受搭飛機喎。
Jason話，囝囝已經去過台灣、韓國及新加坡，計劃帶佢去泰國布吉玩吓水，諗住遲啲嘗試帶個仔再去遠啲。講起旅遊，佢話世界盃同奧運一向會影響旅客外遊意欲，因為大家掛住睇賽事，不過，同樣因為世界盃，令市民認識多咗俄羅斯等城市，多咗興趣去玩吓。
陳光明去斯里蘭卡睇保育
中華總商會常務會董陳光明最近就去咗斯里蘭卡，睇到有BB咁大嘅海龜。今次佢係專門去睇保育，好多時漁民捕魚時會整傷海龜，保育人士會救咗海龜返嚟治療，然後再放番佢哋出海。斯里蘭卡係一帶一路沿線國家，發展都唔錯，唔少殖民地時代嘅建築活化成酒店，佢仲喺當地睇太平洋嘅日落，好正。
呢一日係潮州商會青年委員會嘅活動，搞手之一章曼琪（Katherine）邀請財經事務及庫務局副局長陳浩濂（Joseph）做主講嘉賓，出席嘅仲有投資者教育中心管治委員會成員劉文文、香港鑽石總會副主席胡劍江等人。原來Katherine同陳曾經係舊同事，其後陳做中西區區議員時，Katherine仲係佢嘅選民添，真係有緣分！Joseph演講時提到，金融科技會取代好多傳統工種，不過同時會有新工種出現，所以如果把握得好就可以鞏固香港嘅國際金融中心地位啦。
卓妮