政情：廿幾年冇下廚 梁栢賢姿勢十足
醫院管理局行政總裁梁栢賢（PY）平日多以西裝同醫生袍示人，但早前佢喺Facebook上公開圍裙造型，仲要揸住鑊剷入廚，姿勢分十足，但其實係佢廿幾年來首度下廚，唔知味道又如何呢？
朋友不時提醒拎高隻鑊
呢一日PY煮嘅係番茄炒牛肉，係佢留學澳洲時嘅拿手小菜，自言食落都可以喎。不過從佢上載嘅短片所見，不時有人在旁提醒佢要拎高啲隻鑊，睇嚟佢啲朋友對佢嘅廚藝無乜信心喇。
不過，網友對佢下廚嘅反應就幾好，唔少人讚佢入得廚房，出得廳堂，又認為碟餸賣相好得，問佢幾時開檔添。PY明年就會退休，有網友見佢廚藝有番兩手，就叫佢退休之後唔使請工人添！