政情：區會委員會零出席 梁志祥劉業強鬥蛇王

其實唔少區議員當選做立法會議員後，因為要兼顧職務，都會將區議會嘅工作量減磅，不過只有梁志祥一人，任何一個區會嘅委員會都冇加入。佢呻話本來加入咗地區設施管理委員會，逢星期五開會，但周五立法會有財務委員會同內務委員會，間唔中仲有工務小組會議，撞晒時間，令佢分身不暇喎。雖然冇加入區會委員會，不過梁志祥強調會睇番議程，研究地區嘅小型工程，有時直接搵政府官員傾。

至於屯門區議會，上半年開咗三次大會，劉業強只出席兩次，六個委員會中就只加入兩個，分別都只係開咗一次會，四月仲退出埋其中一個地區設施管理委員會添！劉解釋，因為區議會同行會撞晒時間，所以要睇議程嚟決定係咪出席區會。

張國鈞鄭泳舜都要勤力啲

東區區議會仍未有今年嘅出席率，至於觀塘區同北區只係統計到三月，暫時缺席最多委員會會議嘅就係港島區議員張國鈞，十五次會議中只去咗十次，而六次特別會議就只係去咗三次。其次就係同屬九龍城區嘅李慧琼，十四次會議只出席十次。而最勤力就係離島區周浩鼎、灣仔區謝偉俊、黃大仙區胡志偉、北區嘅劉國勳同埋林卓廷，佢哋都去齊晒啲會議。

早前區議會選區劃界建議出爐，有七位雙料議員受影響，包括深水埗區鄭泳舜。睇番佢出席該區委員會情況，十六次委員會會議中，只係去咗十二次，係蛇王嚟，另外一次特別會議都冇影。選區劃界嘅影響尚待評估，但如果連會都唔開嘅話，分分鐘會被市民用選票懲罰，睇嚟下半年大家要勤力啲喇。