中環出更：羽毛球技麻麻 區諾軒扮番金教練
曾經因為個樣似前香港足球代表隊教練、南韓籍嘅金判坤，而有個「金教練」花名嘅民主派立法會議員區諾軒，雖然畀人叫教練，但平日見佢斯斯文文，唔知球技又點呢？佢踢波踢成點就唔知，不過打羽毛球就似乎有啲雞手鴨腳咁喎。
區同埋香港眾志秘書長黃之鋒、南區萬事屋社區幹事袁嘉蔚等人早兩日一齊去打羽毛球，黃仲直播區打波添。睇番直播片段，區有別於其他人着住一身運動服，反而着住恤衫長褲上陣。見佢發球嘅姿勢都有板有眼，之不過接球時就認真麻麻，好多時都接唔到，有幾下仲輕輕踎一踎，姿勢睇落都幾搞笑。同佢拍住打雙打嘅袁嘉蔚就球球有力，連用球拍執波都識，似乎平時有打開咁。
對決時企喺球證一方
區打咗一陣就收手唔打，離場時仲吹咗下哨子添，唔知搞緊乜。佢之後喺Facebook上載一張帶住哨子、企喺個網隔籬望住球員嘅相，仲話決定喺羽毛球對決時站在「球證的一邊」喎。唔通佢自知球技一般，突然間覺得扮演番「金教練」更適合？
卓妮