中環出更：赴韓取經莊學海睇中股市遊戲
韓國已成為港人旅遊同扮靚嘅朝聖熱點，香港——韓國商貿合作圓桌會議主席莊學海（Bob）都係韓國擁躉，但佢唔係去消閒玩樂，而係為兩地科技及初創公司牽線。早前佢就同業界一齊去韓國取經、參觀，形容好有得着，仲話中美貿易戰之下，多啲同韓國做生意，咪可以避險囉！
Bob話今次參訪見到當地政府對初創、科技公司好支持，希望港府都可以咁做。此外，今次同一齊訪韓嘅本地科技界多啲了解之後，發覺佢哋都做得唔錯，日後大家可以互相合作。至於佢實際嘅得益，就係發現有韓國初創公司開發一隻同股市有關嘅網上遊戲，佢好有興趣投資添！
陳幼南10月帶鄉親坐高鐵
同場仲有香港生產力促進局主席林宣武（Willy）同埋堂兄、潮州商會副會長林宣亮（Alfred），兩位堂兄弟好少同場合照，連Alfred都笑稱好難得。卓妮見Bob同Willy好好傾，原來佢哋係兩代情，Bob大讚Willy有好好嘅基因，事關佢爸爸當年喺上海讀過大學，又識英文，係好難得嘅才子，但Willy就笑自己好懶喎。
潮屬社團總會主席陳幼南、香港中華廠商聯合會副會長馬介欽同觀塘區議會主席陳振彬都喺度，陳幼南預告十月份將組織鄉親坐高鐵返鄉下，到時會有六百人齊齊坐高鐵專列。陳振彬聽完都話好吸引，事關佢每年清明節都要返鄉下拜山，次次都係清晨四時自己揸車出發，五小時後到達，拜山後同鄉親食餐飯，兩點幾又踏上歸途，都咪話唔攰。高鐵通車後，佢就唔使咁辛苦啦！
卓妮