睇過懷舊港產殭屍片嘅都知，主角撞邪之後通常都會嚇到呆若木雞，香港班官老爺坐視「南亞村」亂象叢生，深水埗區淪為九反之地，你話佢哋到底係撞邪，抑或畀恐武有力、惡形惡相嘅南亞幫嚇到傻咗，齋企喺度唔識郁吖嗱？
唔係講笑，警方繼前日喺毗鄰通州街天橋底嘅麗閣邨檢獲懷疑手槍及子彈、拘捕兩名持「行街紙」孟加拉聲請漢，尋日又喺南昌街起出懷疑槍械，雖然最後證實係流嘢，但計埋之前喺通州街嗰單，今次已經係短短一星期內第三次發現真假槍械及子彈；至於涉及南亞兵團嘅搶劫、傷人等罪行，區內每日閒閒哋都有幾單，尋日半小時內就有兩單，都咪話唔得人驚。
正如詩人話齋，不要問喪鐘為誰而敲，喪鐘為你我而敲。假難民勢力喺港九新界遍地開花，深水埗可以有南亞村，其他各區一樣可以有。好似油尖旺區咁，地方人士反映渡船街橋底及佐敦一帶被大量南亞幫搭建木屋佔地為王，老爆販毒樣樣齊，居民苦不堪言。元朗區更加不在話下，南亞幫進駐洪水橋搭屋自住不特止，仲呼朋引類租畀同鄉，搞到成個地方烏煙瘴氣，難怪元朗居民要組建「更練團」自保喇。
南亞村二百幾間木板屋擺明係違法建築，點解咁多年嚟冇人清拆？鬼咩，食環署、路政署、地政總署、康文署、民政事務總署同埋社署六個衙門互相扯皮鬥卸膊，鬧市天橋底咪淪為九龍寨城式嘅「三不管」地帶囉。官老爺連拆木板屋咁簡單嘅事都搞唔掂 ，你話點管好成個香港吖？唔怪得有人質疑，港產官僚係咪傻咗喇。
真係諗極唔明，各大衙門對南亞幫投鼠忌器，除咗少做少錯、唔做唔錯嘅官僚作風使然，唔通真係純粹擔心安置難嘅問題？香港又冇禁閉式難民營，唔通叫班假難民去禮賓府、門常開紮營咩？查實官老爺除咗懶到出汁，更加欺軟怕硬。港版城管驅趕露宿者、圍捕街邊擺檔嘅老婦就耍家啫，叫佢哋同南亞兵團硬碰，畀個甕缸佢哋做膽都唔敢。咪話功夫茶唔提醒，南亞幫喺深水埗氣燄囂張，完全唔將執法部門放喺眼內，罪惡只會不斷升級，今日就話收埋幾支炮仔，他日話唔埋私藏手榴彈、迫擊炮、炸彈，成為名副其實嘅軍火庫，到時軍器廠街連同警察總部，直接搬去南亞村都得嘞。
「纖纖不伐，必成妖孽」。漢初對匈奴實行和親嘅綏靖政策，結果匈奴乘機坐大勢力，邊患不斷，賠了公主又折兵。今時今日特衰政府都係一樣，如果唔係佢哋姑息養奸，假難民問題又點會積重難返。漢朝就話有雄才偉略嘅武帝撥亂反正，主動出擊啫，旨意香港班廢官，蚊都瞓蛇都死喇！