政情：馬逢國教減肥：少食不戒口
網上流傳唔少健身大法教人減肥，立法會體育、演藝、文化及出版界議員馬逢國亦有自己嘅減肥大法，就係減食量但唔戒口，仲試過兩個月減咗廿幾磅，咁睇嚟有多少參考價值喎。
馬逢國話，自己之前要通波仔，所以停咗一段時間冇做運動，由於依家身體重咗，健身嘅話會因為太重，搞到關節負荷唔到而受傷，所以佢先決定要減肥，令身體輕啲。佢又自言，肌肉本身有記憶，如果唔做運動嘅話，就會回復番之前有嘅脂肪，所以只減食量，唔使戒口都可保持身形苗條。
姚思榮成日去立會健身室
至於旅遊界議員姚思榮亦向來有健身，之不過近兩年因為個胃唔舒服，有一段時間冇做健身，依家好番就開始做踏步機同埋拉筋儀器，慢慢玩番健身嘞！佢又透露，自己成日用立法會健身室，估計同馬逢國係使用率最高嘅頭兩名議員。