政情：國際禁忌 大學生「反V」同林鄭自拍
特首林鄭月娥日前到北京訪問，期間探望兩班喺北京實習嘅香港大學生，林鄭事後於社交網站上載多張照片，其中一張引起網民熱議，就係有一名大學生右手手持手機同林鄭自拍，左手就舉起一個「反V」，即手背朝外、手心向內嘅V字手勢，惹來林鄭係咪被寸都唔知嘅疑雲。
翻查資料顯示，「反V」手勢係有不雅、侮辱嘅意思，亦係國際禁忌，最為人熟悉嘅就係已故英國前首相邱吉爾曾做反V手勢攻擊政敵。
疑畀人寸都唔知 上載社交網
今次「反V」合照面世令人有多個聯想，包括究竟林鄭同該名大學生合照時係咪為意對方做「反V」手勢、該名大學生係有意定無意去做呢個手勢，同埋負責管理林鄭社交網站嘅人員揀咗呢張合照出街會否「被問責」。
其實林鄭已非首次同網民「同行」而弄巧反拙，今年三月佢出席民主黨活動時公開向該黨捐款三萬元，跟住喺社交平台上載相片並形容為「大和解」，事後就被建制派炮轟，佢事後就話係特首辦下屬「自作主張」，試圖用賴人呢招甩身。