政情：梁卓偉憶做官唔知係咪誤入歧途

戴頭盔稱講笑 又呻研究乏資源

梁卓偉尋日出席一個佢喺廿一年前擔任研究員嘅研究計劃活動，趁機細數過往多年嘅工作同埋研究成果，當中包括二○○三年沙士一役嘅點滴。而講到○八年、即佢加入政府，出任食衞局副局長嗰年時，佢就竟然話自己唔知係咪誤入歧途而入咗政府，但自己做咗官就要做啲嘢喎。不過佢之後又為其「誤入歧途論」「戴頭盔」，再三強調自己係話唔知係咪誤入歧途，而非斷言入政府係錯誤決定，其後佢再被追問時更反問「講笑都得啩？」

二○○八年投身官場嘅梁，係政府擴大政治委任制後首批副局長。至二○一一年，佢就出任特首辦主任，但至二○一二年政府換屆，佢就未有過渡至新一屆政府，前後只係四年就離開熱廚房，再加上「誤入歧途論」，難免令人聯想佢係止蝕提早離場。

梁喺分享做副局長嘅工作時，就提到當年推動室內全面禁煙，禁煙範圍包括桑拿浴室、麻雀館、夜總會等。當時佢要落手同唔同行業及層面嘅人士溝通，又要去從未入過嘅麻雀館同夜總會，佢形容同有關人士開會時覺得對方衣着特別，說話方式亦令長期喺學校同醫院嘅佢唔習慣。不過佢都知點都要做，唔能夠只留喺象牙塔咁話。之後佢又批評，香港投放喺研究項目上嘅資源不足，甚至係喺發達地區當中最低，認為政府資助對所有嘅研究都好重要。言下之意，係咪覺得政府喺研究上投放不足呢？

其實梁喺今年初出席座談會時就曾自爆，政府開始推行問責制時已獲邀加入政府，而一二年時亦獲邀過渡至新一屆政府，只係佢曾自我承諾只會做一屆政府任期，之後就會返港大幫手籌研究經費。故此，佢都係志不在官場先至毅然離開政府熱廚房啫。