中環出更：稱警方唔告峯鴿 郭卓堅疑擺烏龍
民主黨立法會議員許智峯（峯鴿）四月強搶保安局女行政主任（EO）的手機事件引起廣泛關注。有「長洲覆核王」之稱嘅長洲居民郭卓堅更就事件到警察總部報案控告女EO，又指政府派官員到立法會監察議員係違反《基本法》，並提出司法覆核。郭尋日突然喺社交網站話警方唔會起訴峯鴿，而佢都會撤銷司法覆核。不過，警方冇公布過話唔告峯鴿，唔通郭擺烏龍？
警信件只話唔告涉案官員
郭嘅留言話：「許智峰（峯）不會被控，警方不控訴許智峰（峯）」，佢都會撤銷司法覆核，「但我却（卻）損失四萬元律師費」。不過，根據郭上載警方畀佢嘅信件，警方只係就佢舉報嘅一宗違反《基本法》及《立法會（權力及特權）條例》、「遊蕩」、「有犯罪或不誠實意圖取用電腦」及「公職人員行為不當」嘅案件，交代已完成調查，現時證據不足以證明任何人觸犯罪行。即警方只係話唔告涉案政府官員，並唔係話唔告峯鴿。
郭接受本報查詢時話，警方已經暗示涉事人員都唔會告，又批評警方封信「模棱兩可」。郭強調仲未撤回覆核，聽日同律師商量，如果警方唔告峯鴿，佢先會撤回覆核，又呻已經就覆核案使咗四萬元律師費。
卓妮