「臭名遠揚」呢個四字成語，相信小學生都識，但大家又有冇諗過，一個地方污糟邋遢起上嚟，淨係股強烈惡臭已經可以引領你到達目的地，連GPS都慳番，真係唔到你唔服。
呢嗱，唔係亂噏0架。有政黨公布調查結果，列出灣仔區十大骯髒街道，其中威菲路道食肆林立製造大量廚餘，加上啲人喺後巷亂放垃圾，當地街坊形容為「聞得到、睇得見」，名副其實「臭名遠揚」；至於木星街、安樂里等其他衞生黑點，唔係垃圾桶長期滿瀉，就係通街鴿鳥糞便冇人理，總之一句講晒，亂過亂葬崗係啦！
香港地搞成今日咁藏污納垢，鼠蟻橫行，除咗因為部分市民貪方便罔顧公德，官老爺卸膊成性，亦係難辭其咎。有地區人士爆料，區內一架廢棄電單車喺私家巷內三年原封不動，向警方投訴，對方就話架電單車冇車牌兼冇驅動系統，所以唔算係「一架車」；向食環署投訴，對方就賴係他人財物無法處理；地政總署仲絕，一句「地段屬私人地方」關人個關，所謂「欲卸之責，何患無詞」就係咁解。
以上情節係咪熟口熟面呢？冇錯嘞，港產官僚冇嘢叻，最叻就係大腳傳中，永遠都係三個和尚無水飲。處理病樹危樹塌樹問題，各部門互相扯皮，互相推諉，等到搞出人命至急急補鑊，成立樹木辦進行跨部門統籌，結果情況冇改善不特止仲不斷惡化，反而官位愈設愈多，公帑倒水咁倒，納稅人焗住高薪養廢，冤過竇娥。大家有眼見，小至屋邨居民亂咁晾衫，大至店舖阻街、工廈違規擅改用途，甚至係有「南亞村」之稱嘅深水埗通州街天橋底僭建物，無一例外都係多人管等於無王管，咁搞法唔出事至奇。
特別係通州街天橋底，涉及食環署、路政署、地政總署、康文署、民政事務總署及社署等六個衙門，個個你眼望我眼，殖民地時代九龍寨城就話「三不管」，家陣執法部門買咗班五大三粗嘅假難民怕，直頭搞到「六不管」。喺咁嘅情況下，天橋底淪為罪惡淵藪，南亞幫鵲巢鳩佔，安營紮寨，黑幫分子就地揀蟀，甚至光天化日下燒黃紙斬雞頭，大搞入會儀式。前幾日之嘛，警方至喺「南亞村」搜獲霰彈槍及多發子彈，官老爺繼續闊佬懶理，麻木不仁，遲早爆大鑊嘅咋！
有人話「港人治港」失敗，珍珠都冇咁真。事關根據警方「冇車牌兼冇驅動系統，唔算係一架車」嘅神邏輯，港產官僚冇靈魂兼冇責任心，根本唔算係一個人，只能算係一條柴，仲要係一條白支美國總統級數人工福利嘅廢柴，「廢柴治港」咯喎，結果咪烏煙瘴氣囉！