運輸署轄下嘅黃大仙雙鳳街停車場月租車位，每月廿三日早上七點開賣，近幾個月有意租車位嘅車主都陷入噩夢，事關以往凌晨四時排隊就能成功購買月票，但近月發現有排隊黨出動，令開售前一晚十一時已接近額滿。一班車主忍唔住發出怒吼，鬧爆點解呢個年代仲未可以網上申請呢？仲話會向運輸署投訴。運輸及房屋局局長陳帆早前曾公開表態贊成運輸及房屋分家，而佢就寧願選擇睇房屋，唔知係咪因為咁，佢一於闊佬懶理呢？
