政情：今日你上鏡：肥老闆帶孫仔遊東歐叉電

金融服務界立法會議員張華峯（肥老闆）呢兩日趁放暑假，急不及待飛咗去東歐歎世界。佢尋日喺Facebook放咗唔少旅行相，包括有著名景點多瑙河，仲去咗鋸牛扒、飲葡萄酒等等。今次肥老闆唔止自己一個去玩，仲帶埋兩個孫仔一齊。睇番啲相，肥老闆同兩個孫合照時，小朋友仲擺晒古靈精怪嘅甫士，都幾調皮。今次東歐之旅肥老闆一定好開心，仲叉足電，事關佢自己都標籤「有孫相伴放假去東歐充電」喇！