政情：行醫為先 高永文未表態參選
自決派劉小麗去年因為宣誓風波而被取消立法會議員資格（DQ），其九龍西議席補選將會喺今年十一月舉行，一直盛傳食物及衞生局前局長高永文將披甲上陣。高尋日出席活動時被問到呢個問題，重申會以臨床工作為優先，暫未決定係咪參加補選，但係好快會作出決定喎。
臨床工作已屬成熟階段
身為骨科醫生嘅高又指，去年離開政府後，最大志向係恢復臨床工作，所以去年八月就拿拿聲開業，形容依家臨床工作已屬於「好成熟」階段，任何下一步嘅工作路向都要確保不影響臨床工作，同埋確保病人獲得延續醫療照顧。至於嚟緊嘅補選，若有任何人適合參選，佢會一如既往全力支持。
問及經民聯深水埗區議員梁文廣係咪合適嘅參選人，高則迴避直接評論，只係話合適嘅人選必須有充分時間投入地區工作，並以香港市民整體利益出發咁話。